Бишкектин жаңы аймактарында 100 чакырымга жакын жол оңдолду
Бишкектин жаңы аймактарында жолдорду оңдоо, көчөлөрдү жарыктандыруу, инженердик тармактарды жаңылоо жана социалдык объекттерди куруу иштери жүргүзүлүүдө. Бул иштер административдик-аймактык реформанын алкагында аткарылып жатат. Бул тууралуу мэриянын басма сөз кызматы кабарлады.
Маалыматка ылайык, жаңы аймактарда дээрлик 100 чакырым жол оңдолуп, 3 200дөн ашык жарык чекити орнотулган. Ошондой эле 57 чакырымдан ашык канализация тармагы курулуп, жаңыртылган.
Мындан тышкары, суу өткөргүч жана сугат тармактары, кудуктар жана насостук станциялар курулуп, жаңыланган.
Социалдык инфраструктураны өнүктүрүү багытында жаңы аймактарда 9 мектеп, бала бакчалар жана ооруканалар курулган. Ошондой эле балдар жана спорт аянтчалары, скверлер жана стадиондор пайда болгон.
Маалыматта айрым долбоорлор аяктаганы, башкалары улантылып жатканы, дагы бир бөлүгү ишке ашыруу баскычында экени белгиленген.
