Бишкекте көмүр базаларында 10 миң тоннадан ашык көмүр бар
Бишкек шаарынын мэри Айбек Жунушалиев борбор калаадагы көмүр базаларын кыдырып, алардын кыш мезгилине даярдыгын текшерди. Бул тууралуу мэриядан билдиришти.
Маалыматка ылайык, шаар башчысы Полевой көчөсүнүн № 1/7 жана Достоевский көчөсүнүн № 97к даректериндеги көмүр базаларында болуп, отундун запасы жана сатууга даярдыгы менен таанышты. Учурда шаардагы көмүр базаларында 10 миң тоннадан ашык көмүр бар.
Бишкекте жалпысынан 38 көмүр кампасы иштейт. Алардын 27–28и тиешелүү келишимдердин негизинде иш алып барат. Бул көмүрдүн запасына жана баасына көзөмөл жүргүзүүгө, ошондой эле тургундарды отун менен жеткиликтүү баада камсыз кылууга шарт түзөт.
Учурда көмүрдүн бир тоннасы 7 миң сомдон сатылууда. Мэриянын маалыматына ылайык, баа монополияга каршы жөнгө салуу талаптарына ылайык белгиленген.
Мындан тышкары, көчмө жыйында шаардагы жылуулук менен камсыздоо объектилеринин жылытуу мезгилине даярдыгы каралды. Айбек Жунушалиев шаардагы отканалар толугу менен даярдалып, жылытуу мезгилин баштоого даяр экенин белгиледи.
"Кыштын алгачкы кары жаагандан кийин дүрбөлөң жаралбашы үчүн көмүрдү алдын ала сатып алыңыздар. Кыш мезгилине өз убагында даярдануу зарыл", - деди ал.
Жыйынтыгында тиешелүү кызматтарга көмүрдүн жеткиликтүүлүгүнө жана баасына көзөмөл жүргүзүүнү улантуу, ошондой эле кыш мезгилинде борбор калаанын тургундарын жетиштүү көлөмдөгү отун менен камсыз кылуу тапшырылды.
