Кыргызстан санкциялык тобокелдиктерди азайтуу боюнча көзөмөлдү күчөтөт
11-июнда Президенттин санкциялык саясат жана санкциялык тобокелдиктерди азайтуу маселелери боюнча атайын өкүлү Бакыт Сыдыков өлкөнүн финансы-экономикалык тутумунун ачык-айкындуулугун камсыз кылуу, улуттук кызыкчылыктарды коргоо боюнча жүргүзүп жаткан иштери тууралуу билдирүү жасады.
Экономика жана коммерция министринин айтымында, мамлекеттин финансылык инфраструктурасын жана экономиканын айрым секторлорун санкцияларды айланып өтүү же мыйзамсыз иш-аракеттер үчүн пайдаланууга жол бербөө боюнча системалуу чаралар көрүлүп жатат.
Бакыт Сыдыков президент Садыр Жапаровдун 2026-жылдын 3-июнундагы №198 Жарлыгы менен санкциялык саясат жана санкциялык тобокелдиктерди азайтуу маселелери боюнча атайын өкүл болуп дайындалганын айтып, бул чечим мамлекеттик органдардын ишин координациялоону жана эл аралык өнөктөштөр менен бирдиктүү позицияны камсыздоого багытталганын билдирди.
“Президент Садыр Жапаров 2026-жылдын 3-июнундагы №198 Жарлыгына ылайык, мен президенттин санкциялык саясат жана санкциялык тобокелдиктерди азайтуу маселелери боюнча атайын өкүлү болуп дайындалдым. Мамлекет башчысынын бул чечими өлкө экономикасын санкциялык тобокелдиктерден коргоо боюнча мамлекеттик органдардын ишин так координациялоого, ошондой эле чет өлкөлүк өнөктөштөр, эл аралык уюмдар жана финансылык институттар менен өз ара аракеттенүүдө Кыргыз Республикасынын бирдиктүү позициясын иштеп чыгууга багытталган”, – деди ал.
Министр өзгөчө көңүл виртуалдык активдер рыногуна бурулуп жатканын белгиледи. Анын айтымында, бул тармак экономикалык мүмкүнчүлүктөрдү кеңейтүү менен бирге, мыйзамсыз каржылоо, кылмыштуу кирешелерди адалдоо жана санкциялык чектөөлөрдү айланып өтүү сыяктуу тобокелдиктерди да жаратышы мүмкүн.
“Кыргыз тарап виртуалдык активдер тармагына өзгөчө көңүл бурууда. Санариптик финансылык технологиялардын өнүгүшү экономика үчүн жаңы мүмкүнчүлүктөрдү ачат, бирок ошол эле учурда натыйжалуу жөнгө салууну жана көзөмөлдү талап кылат”, – деди Бакыт Сыдыков.
Ошондой эле министр Виртуалдык активдер жана блокчейн технологиялары боюнча улуттук агенттиктин түзүлүшү тармактагы көзөмөлдү күчөтүүгө өбөлгө болорун белгиледи.
Мындан тышкары, министр Кыргызстан батыштагы өнөктөштөр менен тыгыз кызматташып жатканын белгилеп, алардын өтүнүчү боюнча санкциялык тобокелдиктери жогору деп эсептелген 50 юридикалык жакты жоюу иштери жүрүп жатканын маалымдады.
“Батыштагы өнөктөштөрдүн өтүнүчү боюнча учурда алардын пикиринде жогорку санкциялык тобокелдиктерге ээ операцияларга тартылган болушу мүмкүн болгон 50 юридикалык жакты жоюу иштерин жүргүзүп жатабыз”, – деп белгиледи министр.
Ал ошондой эле Кыргызстан санкциялык саясат маселелеринде ачыктыкты, жоопкерчиликти жана эл аралык укукка берилгендикти кармана берерин айтып, өлкөнүн финансылык системасын жана виртуалдык активдер рыногун мыйзамсыз максаттарда пайдаланууга жол берилбей турганын баса белгиледи.
