"Кепилдик фонду" 10 жылда 21 миңден ашык кепилдик берди
2025-жылдын 31-майына карата "Кепилдик фонд" ААКсы ишмердүүлүгү башталгандан бери ишкерлерге жалпы суммасы дээрлик 20 млрд сомду түзгөн 21 674 кепилдик берди. Анын натыйжасында өлкө экономикасына 61 млрд сомго жакын кредиттик каражат тартылды.
Фонддун маалыматына ылайык, жалпы кепилдиктердин 61% айыл чарба тармагына туура келет. Фонддун колдоосу менен бул тармактагы ишкерлер 11 млрд сомдон ашык кредиттик каражат алышкан.
Өнөр жай ишканалары 10,5 млрд сомдон ашык, ал эми айыл чарба продукциясын кайра иштетүүчү ишканалар 8 млрд сомдон ашык кредит тарткан. Бул тармактар жалпы каржылоонун болжол менен 30% түзөт.
Кепилдиктердин 70% жакыны региондордогу ишкерлерге берилген. Бул жергиликтүү бизнести өнүктүрүүгө жана жаңы жумуш орундарын түзүүгө өбөлгө болууда.
Он жыл ичинде кепилдик механизми өзүнүн натыйжалуулугун далилдеп, миңдеген чакан жана орто бизнес өкүлдөрүнө каржылоого жетүүгө жардам берди.
Быйыл 10 жылдыгын белгилеп жаткан "Кепилдик фонд" ААКсы ишкерлердин каржылоого жетүүсүн кеңейтүү багытындагы ишин улантууда.
