Жаңгак-мөмө токойлору: экологиялык мурас жана экономикалык ресурс
Жалал-Абад облусунда өткөн “Кыргызстандын жаңгак-мөмө токойлору” аттуу эл аралык илимий конференцияда өлкөнүн реликттүү токойлорун сактоо менен катар алардын экономикалык дараметин натыйжалуу пайдалануу маселелери талкууланды.
Иш-чарага Өзгөчө кырдаалдар министри Канатбек Чыныбаев, Токой кызматынын директору Нургазы Чодоев, ошондой эле Европа жана Азиянын 20дан ашык өлкөсүнөн келген 30дан ашуун эл аралык эксперттер, окумуштуулар, экологдор, мамлекеттик органдардын өкүлдөрү катышып, жаңгак-мөмө токойлорунун биологиялык ар түрдүүлүктү сактоодогу жана климаттын өзгөрүшүнө каршы күрөшүүдөгү ролуна өзгөчө көңүл бурушту.
Адистердин айтымында, Кыргызстандагы Арстанбап баштаган реликттүү жаңгак-мөмө токойлору дүйнөдөгү эң ири табигый токой массивдеринин бири болуп саналат. Алар атмосферадагы көмүр кычкыл газын сиңирип, экологиялык тең салмактуулукту сактоого жана климаттык тобокелдиктерди азайтууга жардам берет.
Ошол эле учурда жаңгак-мөмө токойлору өлкө экономикасы үчүн да маанилүү ресурс болуп эсептелет. Жаңгак, бадам, мисте жана башка токой продукцияларын чогултуу, кайра иштетүү жана экспорттоо миңдеген жергиликтүү тургундардын киреше булагын түзөт. Конференцияда токой продукцияларынын кошумча нарк чынжырларын өнүктүрүү, кайра иштетүүнү кеңейтүү жана санариптик технологияларды киргизүү аркылуу тармактын атаандаштыкка жөндөмдүүлүгүн жогорулатуу маселелери көтөрүлдү.
Конференциянын алкагында уюштурулган Арстанбаптагы талаа иш-сапарында катышуучулар токойлордун учурдагы абалы менен таанышып, аларды сактоо жана туруктуу пайдалануу боюнча сунуштарын беришти.
Эксперттер белгилегендей, жаңгак-мөмө токойлорун коргоо – бул бир гана экологиялык эмес, экономикалык мааниге да ээ маселе. Токойлордун сакталышы аймактардагы калктын жашоо деңгээлин жакшыртып, экотуризмди өнүктүрүүгө, жаңы жумуш орундарын түзүүгө жана өлкөнүн экспорттук мүмкүнчүлүктөрүн кеңейтүүгө өбөлгө түзөт.
