Кыргызстанда органикалык айыл чарба аянты 101 миң гектардан ашты
Жыл башында бул көрсөткүч 61,5 миң гектарды түзгөн. 2029-жылга чейин аны 200 миң гектарга жеткирүү пландалууда. Бул тууралуу Айыл чарба министрлиги билдирди.
2026-жылы тармакта бир катар чечимдер кабыл алынды:
Президенттин Жарлыгы менен сентябрь айынын акыркы жума күнү Улуттук органикалык айыл чарба күнү болуп белгиленди. 2025-2029-жылдарга программа кабыл алынып, Борбордук Азияда органикалык азыктар үчүн бирдиктүү стандарт киргизилди.
Маалымдалгандай, бүгүнкү күндө Кыргызстандын органикалык продукциясы 30дан ашык өлкөгө экспорттолот. Чакан фермерлер үчүн чыгымды азайткан катышуучулук кепилдик системасы (PGS) киргизилди.
Бүгүн, 6-октябрда Талас облусунун Ак-Башат айылында 300 гектар аянттагы "Талас Органик" агрокомплекси ачылат. Бул облустагы эл аралык сертификациясы бар алгачкы ири өндүрүштөрдүн бири.
Министрлик белгилегендей, органикалык багыт айылдагы кирешени көбөйтүп, жумуш орундарын түзүүгө жана экспортту арттырууга багытталган.
