Кыргыз-корей экономикалык алакаларын кеңейтүүнүн багыттары аныкталды
12-июнда Бишкекте Кыргыз-корей соода жана инвестициялар боюнча кызматташтык комитетинин биринчи жыйыны болуп өттү. Бул тууралуу Экономика министрлигинен билдиришти.
Маалыматка ылайык, тараптар эки өлкөнүн ортосундагы экономикалык кызматташтыкты кеңейтүүнүн негизги багыттарын талкуулашты.
Жыйындын жүрүшүндө соода жүгүртүүнү жана инвестициялык кызматташтыкты өнүктүрүүгө өзгөчө көңүл бурулду.
Ошондой эле Бишкек шаарында KOTRA соода борборун ачуу жана эки өлкөнүн бизнес өкүлдөрүнүн ортосундагы байланышты чыңдоо маселелери каралды.
Мындан тышкары, катышуучулар критикалык минералдар тармагындагы кызматташтыктын келечеги, өнүктүрүүгө расмий жардам көрсөтүү (ODA) боюнча өз ара аракеттенүү, бизнес жүргүзүү шарттарын жакшыртуу мүмкүнчүлүктөрү тууралуу пикир алышты.
Тараптар мындай жолугушуулар Кыргызстандын жана Түштүк Кореянын ортосундагы соода-экономикалык байланыштарды бекемдөөгө жана жаңы инвестициялык долбоорлорду ишке ашырууга өбөлгө түзөрүн белгилешти.
