Мамлекеттик облигацияларды MegaPay аркылуу сатып алууга мүмкүнчүлүк түзүлөт
Финансы министрлиги Министрлер Кабинетинин тиешелүү чечиминин негизинде калк үчүн мамлекеттик казына облигацияларынын пилоттук чыгарылышын ишке киргизет.
Ведомствонун малыматына ылайык, долбоордун алкагында баалуу кагаздарды жайгаштыруу жана алардын жүгүртүлүшү боюнча сооданы Кыргыз фондулук биржасы уюштурат. Негизги максат — мамлекеттик баалуу кагаздар рыногун жарандар үчүн жеткиликтүү кылуу, финансылык сабаттуулукту жогорулатуу жана өлкөдө инвестициялык маданиятты өнүктүрүү.
Мамлекеттик казына облигацияларынын жүгүртүү мөөнөтү 2 жылды түзөт. Бир облигациянын номиналдык баасы 100 сом болсо, минималдуу сатып алуу суммасы 1000 сомдон башталат. Жалпы чыгарылыш көлөмү 500 миллион сомду түзөт.
Облигациялар боюнча жылдык кирешелүүлүк 17% деңгээлинде белгиленген. Пайыздык төлөмдөр облигация ээлерине квартал сайын жүргүзүлүп турат. Ал эми негизги салынган каражат облигациянын мөөнөтү аяктагандан кийин толугу менен кайтарылат.
Мисалы, жаран 100 миң сомдук мамлекеттик облигация сатып алган учурда, эки жыл ичинде жалпысынан 34 миң сом киреше алат. Бул каражат квартал сайын 4 миң 250 сомдон төлөнүп турат. Мөөнөт аяктаганда негизги 100 миң сом толугу менен кайтарылат.
Финансы министрлигинин маалыматына ылайык, мамлекеттик баалуу кагаздар дүйнөлүк практикада эң ишенимдүү инвестициялык инструменттердин бири болуп саналат. Анткени пайыздык кирешени төлөө жана негизги каражатты кайтаруу мамлекет тарабынан кепилденет.
