“Бирдиктүү терезе” борбору: экспорт жана импортту тариздөө жеңилдеди
Кыргызстанда ишкерлер үчүн тышкы соода операцияларын жүргүзүү эми мындан дагы ыңгайлуу болуп калды. “Бирдиктүү терезе” борбору экспорт жана импорт процессин жөнөкөйлөтүүгө багытталган санариптик кызматтарды сунуштап, документтерди тариздөө убактысын кыйла кыскартууда.
Борбордун маалыматына ылайык, мурда ар кандай мамлекеттик мекемелерден маалымкаттарды чогултуп, бир нече инстанцияга кайрылуу талап кылынса, азыр бул кызматтар бирдиктүү санариптик платформага бириктирилген. Натыйжада ишкерлер көпчүлүк документтерди онлайн режимде тариздеп, убакыт жана чыгымдарды үнөмдөй алышат.
“Бирдиктүү терезе” системасы экспорттук жана импорттук операцияларды жүргүзүүдө ачык-айкындуулукту камсыздап, мамлекеттик кызматтарды алуу жол-жоболорун жеңилдетүүгө багытталган.
Борбордун өкүлдөрү белгилегендей, жаңы мүмкүнчүлүктөр ишкерлерге документ иштерине убакыт коротпостон, бизнесин өнүктүрүүгө жана жаңы рынокторду өздөштүрүүгө көбүрөөк көңүл бурууга шарт түзөт.
Учурда кызматтарды онлайн пайдалануу үчүн ишкерлер connectq.trade.kg платформасы аркылуу каттала алышат. Санариптик чечимдердин киргизилиши өлкөдө соода жол-жоболорун модернизациялоого жана бизнес үчүн жагымдуу шарттарды түзүүгө көмөк көрсөтөт.
