Бажы экосистемасын өнүктүрүүгө арналган эл аралык IT-конференция өтүүдө
Ысык-Көлдө III Эл аралык IT-конференция – «Бажы экосистемасы боюнча диалог» өз ишин баштады. Иш-чара бажы администрацияларынын, эл аралык уюмдардын жана бир катар өлкөлөрдөн келген эксперттердин өкүлдөрүн бириктирди.
КРнын Бажы кызматынынын маалыматына ылайык, жыйындын алкагында бажы кызматтарын санариптик трансформациялоо, жасалма интеллект технологияларын колдонуу, санариптик транзиттик чечимдерди өнүктүрүү, маалыматтык системаларды интеграциялоо жана бажы башкаруусунун заманбап ыкмалары талкууланды.
КРнын Мамлекеттик бажы кызматынын төрагасы Алмаз Салиев заманбап бажы органдары көзөмөл жүргүзүүчү гана түзүм болбостон, эл аралык соода, логистика жана санариптик кызматташтыкты камсыз кылган маанилүү экосистеманын бир бөлүгүнө айланганын белгиледи.
Иш чаранын жүрүшүндө - Азербайжан, Казакстан, Сингапур, Тажикстан, Түркия, Түркмөнстан жана Өзбекстандын бажы администрацияларынын өкүлдөрү өздөрүнүн тажрыйбалары менен бөлүштү.
Мамлекеттик бажы кызматынан белгилешкендей, эл аралык тажрыйбаларды үйрөнүү жана ийгиликтүү санариптик чечимдерди колдонуу аркылуу бажы жол-жоболорун жөнөкөйлөтүүгө, мамлекеттик чек ара аркылуу товар өткөрүү процессин тездетүүгө жана сооданы жеңилдетүүгө өбөлгө түзүлөт.
Конференция КРнын Мамлекеттик бажы кызматы, Бишкектеги ЕККУнун Программалык кеңсеси жана GIZ тарабынан Европа Биримдигинин колдоосу менен ишке ашырылып жаткан «Борбор Азияда соода жол-жоболорун жөнөкөйлөтүү жана Транс-Каспий транспорттук коридорунун потенциалын өнүктүрүү» программасынын алкагында уюштурулду.
