Чүйдө суткасына 180 миң жумуртка өндүрүүчү жаңы канаттуулар фабрикасы ачылды

Чүй облусунда асыл тукум канаттууларды өстүрүүчү «Три Т» заводунун негизги өндүрүш объектилеринин бири болгон «Кировец» канаттуулар фабрикасы расмий ачылды. Агроөнөр жай долбоору Россия-Кыргыз өнүктүрүү фондунун (РКӨФ) каржылык колдоосу менен ишке ашырылды.

Бул тууралуу РКӨФ башкармалыгынын төрагасы Артем  Новиков өз баракчасында белгилеген. Анын билдирүүсүнө караганда, жаңы ишкана суткасына 180 миң даанага чейин жумуртка өндүрүүгө жөндөмдүү. Бул долбоор өлкөнүн азык-түлүк коопсуздугун камсыздоодо маанилүү ролду ойнойт.

Азыркы иштеп жаткан жана жаңы өндүрүш кубаттуулуктарын эске алганда, ишкана Кыргызстандагы тоок жумурткасына болгон ички керектөөнүн 15 % камсыздай алат. Ошондой эле жаңы фабрика 25 жумушчуну иш менен камсыз кылууда.

“Президент Садыр Жапаров белгилегендей, Кыргызстанда башталган ар бир долбоор аягына чейин жеткирилиши керек. РКӨФ “Аталык” компаниялар тобун тоют өндүрүүдөн тартып канаттууларды инкубациялоого жана заманбап технологиялар менен жумуртка өндүрүүгө чейинки вертикалдык интеграцияланган кластерди түзүүдө колдоду. Азыркы учурда жаңы өндүрүш аянтчасында төрт цех ишке берилди. Ар биринде 50 миңден тоок багылса, жалпы канаттуулардын саны 200 миң башка жетти”, — деп белгиледи, Артем Новиков.

РКӨФ өкүлү бул долбоор - тоок жумурткасын өндүрүү боюнча толук циклдүү өндүрүштү өнүктүрүүгө багытталгандыгын билдирди.