“Кепилдик фондго” 10 жыл: 20 миңден ашуун ишкерге колдоо көрсөтүлдү

«Кепилдик фонд» ачык акционердик коомунун түзүлгөнүнө 10 жыл болду. Бул аралыкта мекеме өлкөдө ишкерликти колдоонун маанилүү инструменттеринин бирине айланып, миңдеген ишкерлердин каржылоого жетүүсүнө көмөк көрсөтүүдө.

Фонддун маалыматына ылайык, 10 жыл ичинде 22 миңге жакын ишкер кепилдик колдоого ээ болгон. Жалпы суммасы 20 млрд 131 млн сомдон ашык кепилдик берилип, анын негизинде ишкерлер 61 млрд 554 млн сомдон ашуун кредиттик каражаттарды тарта алышкан.

Ошондой эле берилген кепилдиктердин 80 % ашыгы өлкөнүн аймактарындагы ишкерлерге туура келген. Бул чакан жана орто бизнести өнүктүрүүгө, жаңы жумуш орундарын түзүүгө жана региондордун экономикалык активдүүлүгүн жогорулатууга өбөлгө түзгөн.

Фонд мындан ары да ишкерлерди колдоо механизмдерин өркүндөтүп, бизнестин каржылык ресурстарга жеткиликтүүлүгүн кеңейтүү аркылуу өлкөнүн экономикалык өнүгүшүнө салым кошууну максат кылууда.

ААК «Кепилдик фонд» — Кыргыз Республикасынын экономикасынын туруктуу өсүшүнө активдүү көмөк көрсөтүү максатында түзүлгөн адистештирилген финансылык уюм. Фонд ишкердик секторун колдоо жана өнүктүрүү аркылуу, чарба жүргүзүүчү субъекттердин кепилдик камсыздоо инструменттерин пайдалануу менен финансылык ресурстарга жетүүсүн кеңейтүүгө багытталган.

Кепилдик фонд өзүнүн жетиштүү күрөө мүлкү жок ишкерлерге кепилдиктерди берет, бул алардын банктык жана финансылык кредиттерге жетүүсүн кыйла жеңилдетет. Фонддун инструменттери коммерциялык банктар жана башка финансылык өнөктөштөр тарабынан чакан жана орто бизнести, экспортко багытталган ишканаларды, ошондой эле айыл чарба, өнөр жай, ипотекалык кредиттөө жана туризм сыяктуу экономикадагы артыкчылыктуу тармактарды колдоо үчүн колдонулат