Кыргызстанда орточо айлык акы 46,7 миң сомго жетти
2026-жылдын январь–март айларында Кыргызстанда орточо айлык эмгек акы 46 миң 731 сомду түзүп, өткөн жылдын ушул мезгилине салыштырмалуу 15,8%га өстү. Бул тууралуу Улуттук статистика комитетинин 2026-жылдын I чейрегине карата азык-түлүк коопсуздугу жана жакырчылык боюнча маалыматтык бюллетенинде айтылат.
Маалыматка ылайык, инфляцияны эске алганда эмгек акынын реалдуу өсүшү 5,2%ды түзгөн. Ал эми Улуттук банктын расмий курсу боюнча эсептегенде, өлкөдөгү орточо айлык акы 534,4 $га барабар болгон.
Статистика көрсөткөндөй, бюджеттик эмес тармактагы кызматкерлердин эмгек акысы бюджеттик мекемелердеги кызматкерлердин айлыгынан орточо 1,8 эсеге жогору болгон.
2026-жылдын биринчи кварталында эмгек акынын өсүшү экономиканын бардык тармактарында байкалган. Эң жогорку өсүш төмөнкү тармактарда катталган:
- айыл чарбасы – 34,9%;
- финансылык ортомчулук/камсыздандыруу – 28,8%;
- суу менен камсыздоо/калдыктарды кайра иштетүү – 28,4%;
- кесиптик, илимий /техникалык ишмердүүлүк – 27,6%;
- кыймылсыз мүлк операциялары – 25,9%;
- электр энергиясы, газ/жылуулук менен камсыздоо – 23,9%;
- курулуш – 21%;
- мамлекеттик башкаруу/социалдык камсыздоо – 20,2%;
- административдик кызматтар – 18,8%;
- маданият, көңүл ачуу жана эс алуу – 18,6%;
- транспорт жана жүк ташуу – 17,9%;
- дүң жана чекене соода, автоунааларды оңдоо – 17,7%.
Ошол эле учурда өлкөдө эмгек акы боюнча карыздардын көлөмү дагы көбөйгөн. 2026-жылдын 1-апрелине карата эмгек акы боюнча жалпы карыз өткөн жылдын ушул мезгилине салыштырмалуу 24,3%га өскөн.
Эмгек акы боюнча эң чоң карыз Чүй облусуна туура келип, жалпы карыздын 51,7%ын түзгөн. Андан кийин Жалал-Абад облусу – 39,4%, Бишкек шаары – 3,6% жана Баткен облусу – 2,9% орун алган.
