Электромобилдерди бажы алымсыз ташып кирүүнүн квотасы соңуна чыгууда
Мамлекеттик бажы кызматы 2026-жылга карата электромобилдерди бажы алымсыз ташып кирүү квотасы аяктап жаткандыгын маалымдады.
Бажы кызматынын маалыматына ылайык, ачык-айкындуулукту камсыз кылуу максатында, Мамлекеттик бажы кызматынын расмий сайтында калган квотанын санын реалдуу убакыт режиминде көрсөтүп турган онлайн-эсептегич ишке киргизилген. Андагы маалыматтар жеңилдикти колдонуу менен электромобилдерди бажылык тариздөөдөн өткөрүү учурунда автоматтык түрдө жаңыланып турат.
Билдирүүгө караганда, квота толугу менен аяктагандан кийин электромобилдерди ташып кирүүдө Евразия Экономикалык Бирлигинин Бирдиктүү бажы тарифи боюнча бажы наркынан 15 % өлчөмүндө ташылып келүүчү бажы алымы алына баштайт.
Электромобилдерди ташып кирүүнү пландаштырууда бул маалыматты эске алууну жана, Мамлекеттик бажы кызматынын сайытынан квотанын калдыгын көзөмөлдөп туруу сунушталууда.
2026-жылга карата ЕАЭБ ТЭИ ТН (Тышкы экономикалык ишмердүүлүктүн бирдиктүү товардык номенклатурасы) 8703 80 000 3 жана 8703 80 000 5 коддору менен классификацияланган, алып кирүү бажы алымын төлөө боюнча жеңилдик колдонулуучу электр кыймылдаткычы бар моторлуу транспорт каражаттарынын 15 000 даана өлчөмүндө кирүүсүнө квота белгиленген.
