Электрондук сооданы өнүктүрүү Бүткүл дүйнөлүк бажы уюмунда талкууланды
Бельгиянын борбору Брюссель шаарында Бүткүл дүйнөлүк бажы уюмунун (БДБУ) Кеңешинин 147/148-жылдык сессиясы өтүп, ага КРнын Мамлекеттик бажы кызматынын төрагасы Алмаз Салиев баштаган делегация катышты.
Сессиянын жүрүшүндө БДБУга мүчө 187 мамлекеттин өкүлдөрү 2025–2028-жылдарга карата Стратегиялык планды ишке ашыруу, бажы кызматын санариптештирүү, жасалма интеллект жана маалыматтарды талдоо технологияларын колдонуу, тобокелдиктерди башкаруу системасын өркүндөтүү, электрондук сооданы өнүктүрүү жана эл аралык жеткирүү чынжырларынын коопсуздугун камсыздоо маселелерин талкуулашты.
КРнын Мамлекеттик бажы кызматынын маалыматына ылайык, жыйындын алкагында Алмаз Салиев Бүткүл дүйнөлүк бажы уюмунун Башкы катчысы Ян Сондерс менен эки тараптуу жолугушуу өткөрдү.
Жолугушууда кыргыз тарап өлкөдө жүргүзүлүп жаткан бажы кызматын модернизациялоо, заманбап маалыматтык-аналитикалык чечимдерди, интеллектуалдык тобокелдиктерди башкаруу системаларын жана алдын ала маалыматтарды талдоо технологияларын киргизүү боюнча жүргүзүлүп жаткан реформалар тууралуу маалымат берди.
Ошондой эле тараптар Мамлекеттик бажы кызматынын БДБУнун инновациялык санариптик технологияларды жана интеллектуалдык тобокелдиктерди башкаруу системаларын жайылтууга багытталган пилоттук долбоорлоруна катышуусун кеңейтүү маселесин талкуулашты.
Өз кезегинде БДБУнун Башкы катчысы Ян Сондерс Кыргызстанда жүргүзүлүп жаткан бажы реформаларын жогору баалап, алардын эл аралык бажы стандарттарына жана заманбап администрлөө талаптарына шайкеш экенин белгиледи.
