Өлкөдөгү мыкты салык төлөөчүлөр сыйланышты
Бүгүн, Мамлекеттик салык кызматында КРнын Салык кызматкерлеринин күнү салтанаттуу иш-чара менен белгиленди. Иш-чарага салык кызматынын жетекчилиги, кызматкерлери жана мыкты деп таанылган салык төлөөчүлөр келип катышышты.
Анын жүрүшүндө Мамлекеттик салык кызматынын төрагасынын орун басары Кубанычбек Ысабеков Салык кызматы мамлекеттик бюджетке кирешелердин туруктуу түшүүсүн камсыздап, өлкө экономикасын өнүктүрүүдө жана салыктык башкаруунун сапатын жогорулатууда маанилүү салым кошуп жаткандыгын белгиледи.
Иш-чаранын алкагында өлкөнүн мыкты салык төлөөчүлөрүнө сыйлыктар тапшырып, алардын жогорку салыктык маданиятын, ак ниеттүү эмгегин жана КРнын социалдык-экономикалык өнүгүшүнө кошкон олуттуу салымы баса белгиленди.
Мыкты салык төлөөчү катары - «Авангард Стиль» ЖЧК курулуш компаниясы, «Сапат» эл аралык билим берүү мекемеси, «СИНЕМАТИКА» ЖЧКсы жана башка ондон ашык ишканалар менен жеке ишкерлер аталышты.
Мындан тышкары, салтанаттуу иш-чарада салык тармагындагы кызматташууну чыңдоого кошкон салымы үчүн «Яндекс Кыргызстан» компаниясынын өкүлдөрүнө медаль жана ардак грамота тапшырылды.
