“Кыргызнефтегазда” дээрлик 967 млн сомдон ашуун каржылык мыйзам бузуу аныкталды
Эсептөө палатасынын Кеңешинин кезектеги жыйынында өлкөнүн стратегиялык маанидеги ири ишканаларынын бири болгон “Кыргызнефтегаз” ААКсынын 2025-жылдагы ишмердүүлүгүнө жүргүзүлгөн шайкештик аудиттин жыйынтыгы каралды.
Аудиттин жыйынтыгында ишканада 967 млн 824,3 миң сомдук каржылык мыйзам бузуулар жана олуттуу кемчиликтер аныкталган. Бул каражаттын ичинен 135 миллион 888,7 миң сому мамлекетке милдеттүү түрдө кайтарылууга тийиш болсо, аудиттин жүрүшүндө анын болгону 8 миллион 904,9 миң сому гана иш жүзүндө калыбына келтирилген.
Эсептөө палатасы белгилегендей, ишкана жана анын туунду компаниясы өз убагында өндүрүштүк чараларды көрбөгөндүктөн, 494 млн 958,7 миң сомдук кошумча кирешеден кол жууган. Мындан тышкары, аудит төмөнкүдөй мыйзам бузууларды аныктаган:
- эмгек акы фондун бөлүштүрүүдө 281,4 млн сомдук мыйзам бузуулар;
- дебитордук карыздар боюнча 120 млн сомдук натыйжасыз иш;
- 53,9 млн сомдук ченемден тышкары негизсиз чыгымдар;
- капиталдык курулуш иштеринде 6,5 млн сомдук мыйзам бузуулар;
- мамлекеттик сатып алууларда 2,1 млн сомдук эреже бузуулар.
Аудиттин жыйынтыгы “Кыргызнефтегаз” ААКсынын жетекчилиги ички ресурстарды натыйжасыз пайдаланып, мамлекеттик мүлктү үнөмдүү сарптоо принцибин орой түрдө бузгандыгын көрсөттү. Эсептөө палатасы тарабынан ишкананын жетекчилигине аныкталган кемчиликтерди тез арада жоюу жана калган каражатты мамлекетке кайтаруу боюнча эскертүүлөр берилди. Бул ири чыгымдарга жана мыйзам бузууларга укуктук баа берүү үчүн аудиттин материалдары тиешелүү тартипте коргоо органдарына өткөрүлүп берилет.
