Алдамчылыктын курмандыгы болсоңуз, “Түндүк” аркылуу ыкчам арыз бериңиз
Кыргызстандыктар эми интернет алдамчылыгы же шектүү чалуулар болсо, мамлекеттик органдарга “Түндүк” мобилдик тиркемеси аркылуу онлайн негизде, ыкчам кайрыла алышат.
Эгер жаранга шектүү телефон чалуу же билдирүү келип, же ал шылуундардын курмандыгы болуп калса, арызды электрондук түрдө жөнөтүүгө мүмкүнчүлүк бар. Тиркеме аркылуу колдонуучулар:
- электрондук кайрылуу түзө алышат;
- тиешелүү мамлекеттик органды тандай алышат;
- сүрөт, скриншот - далилдөөчү материалдарды тиркей алышат;
- кайрылууну онлайн жөнөтө алышат.
Адистер белгилегендей, шылуундук тууралуу мүмкүн болушунча эрте кабарлоо окуяны ыкчам иликтөөгө жана мындай кылмыштардын алдын алууга жардам берет.
Ошол эле учурда жарандарга сак болуу сунушталат. Банктар кардарлардан эч качан акча каражаттарын «коопсуз» же «резервдик» эсептерге которууну талап кылбайт, ошондой эле SMS-коддорду, PIN-кодду, CVV-кодду, сырсөздөрдү же мобилдик тиркемеге кирүү маалыматтарын сурабайт. Мындан тышкары, эсептеги же депозиттеги каражаттарды чыгарып, үчүнчү жактарга өткөрүп берүүнү талап кылган чалууларга ишенбөө керек.
