Кыргызстанда ширеңке чыгарган ишкана ачуу пландалууда
Экономика жана коммерция министрлигинин өкүлдөрү Өзбекстандын соода өкүлчүлүгү ширеңке продукциясын өндүрүүчү алдыңкы өзбек ишканасы – “MILLENIUM LIGHT” ЖЧКсынын жетекчилиги менен жумушчу жолугушуу өткөрдү. Бул тууралуу аталган министрликтин маалымат кызматы билдирди.
Маалыматка ылайык, шканага болгон сапардын жүрүшүндө соода өкүлчүлүгүнүн өкүлдөрү өндүрүштүк кубаттуулуктар, технологиялык цикл жана өндүрүлүп жаткан продукциянын көлөмү менен таанышышты.
Тараптар Кыргызстандын аймагында биргелешкен ишкана түзүү мүмкүнчүлүгүн ар тараптуу изилдөө, ошондой эле Кыргызстанда ширеңке продукциясын түз жеткирүүнү уюштуруу үчүн механизмдерди жана логистикалык каттамдарды иштеп чыгуу боюнча макулдашышты.
Соода өкүлү Бакай Акбаралиевдин айтымында, бул долбоор логистикалык чыгымдарды оптималдаштырууга, ички базарды сапаттуу ширеңке продукциясы менен камсыз кылууга, ата мекендик өнөр жай потенциалын өнүктүрүүгө, түз чет өлкөлүк инвестицияларды тартууга жана жаңы жумуш орундарын түзүүгө өбөлгө түзөт.
Өз кезегинде ишкананын жетекчилиги Кыргызстандын базарына чыгууга чоң кызыгуусун билдирди. Өзбек тарап биргелешкен ишкана түзүү долбоорун кароого жана жакынкы аралыкта өндүрүштүк-экономикалык маалыматтар менен өз ара алмашууну баштоого даяр экенин ырастады. Бул кызматташуунун келечегин жана анын экономикалык натыйжалуулугун ар тараптуу баалоого мүмкүндүк берет.
