“Тамчы” атайын финансылык инвестициялык аймактын ачылышы болду
3-июлда Ысык-Көл облусунун Тамчы айылында “Тамчы” атайын финансылык инвестициялык аймактын ачылышы болуп өттү. Иш-чарага Садыр Жапаров, өкмөт өкүлдөрү, эл аралык эксперттер жана инвесторлор катышышты.
Президент бул аймак дүйнөлүк экономикадагы өзгөрүүлөр жаңы бизнес борборлоруна суроо-талапты жаратып жатканда - эл аралык стандарттар инновациялар жана узак мөөнөттүү инвестициялар үчүн чыныгы эркиндик менен айкалыша тургандыгын билдирди.
“Бул долбоорду 5 жыл бою талдап, эл арлык тажрыйбаларды эске алуу менен киргизип отурабыз.“ Тамчы” АФИА – биздин долбоор жана эл аралык бизнестин суроо-талаптарына болгон биздин жооп. Биз финансы борборун эң мыкты дүйнөлүк стандарттар, көз карандысыз сот, заманбап жөнгө салуучу жана кырдаалга жараша өзгөрбөгөн эрежелер менен нөлдөн баштап куруп жатабыз. Бул жерде резиденттерди көз карандысыз арбитраж жана мурда региондо курууга мүмкүн болбогон нерселерди куруу мүмкүндүгүн берген жөнгө салуучу чөйрө күтөт” - деп билдирди.
Мамлекет башчынын айтымында, инвестициялык аймак Евразиянын эң кооз бурчтарынын биринде, Тянь-Шань тоолору менен курчалган Ысык-Көлдүн жээгинде орун алышы менен көптөгөн инвесторлордун кызыгуусун жаратат.
Долбоорду ишке ашыруу үчүн АФИА жөнүндө атайын мыйзам, президенттин эки жарлыгы жана өлкөнүн министрлер кабинетинин ондогон чечимдери кабыл алынып, улуттук мыйзамдар да ылайыкташтырылган.
Мындан сырткары, 25 мыйзамга, анын ичинде конституциялык мыйзамдарга бир топ өзгөртүүлөрдү киргизип, “Тамчы” АФИАнын өзгөчө макамын Кыргызстандын укуктук системасына негиздүү түрдө киргизүүгө мүмкүндүк берген. Белгилей кетсек, “Тамчы” АФИА англис мыйзамдарынын принциптерине негизделген жана эл аралык жөнгө салуунун мыкты тажрыйбаларын колдонуу менен өзгөчө юрисдикцияга ээ аймак катары иштейт.
