Дары-дармек импортундагы мыйзам бузуу: Бюджетке 1,3 млн сом өндүрүлдү

Мамлекеттик бажы кызматы дары-дармек импорттоодо КНС боюнча жеңилдик мыйзамсыз колдонулганын аныктады. Натыйжада мамлекеттик бюджетке 1,3 млн сомдон ашык каражат өндүрүлдү.

Мамлекеттик бажы кызматынын кызматкерлери дары-дармек каражаттарын импорттоодо кошумча нарк салыгы (КНС) боюнча жеңилдик мыйзамсыз колдонулганын аныкташты.

Маалыматка ылайык, "Н.В.С.О." компаниясы салыктан бошотулган дары-дармектердин тизмесине кирбеген товарга КНС боюнча жеңилдик колдонгон.

Текшерүүдө дары каражаттарынын бир бөлүгү эриткич (лидокаин) менен бир комплектте импорттолгону аныкталган. Бул дарынын чыгарылыш формасын өзгөрткөндүктөн, ага салыктык жеңилдик колдонууга жол берилбейт.

Мыйзамсыз колдонулган жеңилдиктин суммасы 1,2 млн сомдон ашканы белгилүү болду. Материалдар процессуалдык чечим кабыл алуу үчүн Мамлекеттик бажы кызматынын Тергөө башкармалыгына жөнөтүлдү.

Көрүлгөн чаралардын натыйжасында мамлекеттик бюджетке келтирилген зыян толугу менен өндүрүлүп, казынага 1 303 558 сом түшүрүлдү.