Баткенде бажы жана чек ара кызматкерлерине байланышкан коррупциялык схема аныкталды
Мамлекеттик бажы кызматынын Ички иликтөө башкармалыгы менен Улуттук коопсуздук мамлекеттик комитетинин Баткен облусу боюнча башкармалыгы жүргүзгөн биргелешкен ыкчам-издөө иш-чараларынын жүрүшүндө коррупциялык схемага бөгөт коюлду.
Мамлекеттик бажы кызматынын маалыматына ылайык, мыйзамсыз схемага «Баткен» бажысынын, Чек ара кызматынын жана ветеринардык кызматтын айрым кызматкерлери катышкан.
Алдын ала маалымат боюнча, кармалган кызмат адамдары кызматтык ыйгарым укуктарынан кыянаттык менен пайдаланып, транзиттик жүктөрдүн Кыргызстандын аймагында мыйзамсыз калтырылышына көмөк көрсөтүү үчүн системалуу түрдө мыйзамсыз акчалай сыйлык алып турушкан.
Учурда бул факт боюнча тергөө иш-чаралары улантылып, окуянын бардык жагдайлары такталууда.
