ЕАЭБге мүчө мамлекеттердин энергетика тармагындагы кызматташтыгы талкууланды
КРнын энергетика министринин орун басары Бекнур Маратбеков Москва шаарында өткөн Евразия экономикалык бирлигине (ЕАЭБ) мүчө мамлекеттердин энергетика тармагындагы ыйгарым укуктуу органдарынын жетекчилеринин кеңешинин 14-жыйынына катышты.
Экономика жана коммерция министрлигинин маалыматына караганда, жыйында жалпы газ, мунай жана мунай продуктуларынын, ошондой эле электр энергиясынын рынокторун түзүү маселелери каралды.
Жыйындын жыйынтыгында 2030-жылга чейин жалпы газ рыногун өнүктүрүү планы жактырылды.
Документ Евразия экономикалык жогорку кеңешинин бекитүүсүнө жөнөтүлөт.
Ошондой эле энергетика тармагындагы ченемдик-укуктук базаны өркүндөтүү жана ЕАЭБге мүчө мамлекеттердин кызматташтыгын мындан ары өнүктүрүү маселелери каралды.
