"Кепилдик фонд" 59 млн долларлык "Жашыл кепилдиктер" долбоорун баштады
"Кепилдик фонд ААКсы "Кыргыз Республикасында МЧОИ үчүн туруктуу финансылык рынокту өнүктүрүү" долбоорунун "Жашыл кепилдиктер" компонентин ишке ашырууну баштап, ага катышуу үчүн финансылык уюмдарды тандоону жарыялады.
Фонддун маалыматына ылайык, долбоордун жалпы каржылоо көлөмү 59 млн АКШ долларын түзөт. Анын максаты – микро, чакан жана орто ишкердик субъекттеринин экологиялык долбоорлорду каржылоого жеткиликтүүлүгүн кеңейтүү.
Долбоордун алкагында "Кепилдик фонд" жеке жана портфелдик кепилдиктерди сунуштап, финансылык уюмдардын кредиттик тобокелдиктерин азайтууга жана ишкерлерди насыялоону кеңейтүүгө көмөк көрсөтөт.
Долбоорго Кыргызстандын финансылык уюмдары катыша алышат. Катышуунун шарттары жана талап кылынган документтер "Кепилдик фонддун" расмий сайтына жайгаштырылган.
Өтүнмөлөрдү кароонун жыйынтыгында тандалган финансылык уюмдар "Жашыл кепилдиктер" механизмине кошулат.
