Кыргызстанга күн энергетикасы боюнча ири инвестиция тартуу пландалууда
Кыргызстанда күн энергетикасы үчүн жабдууларды чыгаруучу өндүрүштү түзүү маселеси талкууланды. Бул тууралуу Экономика жана коммерция министрлиги билдирди.
Маалыматка ылайык, бүгүн Экономика жана коммерция министринин орун басары Беназир Нурланова Сингапурдун Sunvera Solar Pte. Ltd. компаниясынын өкүлдөрү менен жолугушуу өткөрдү. Жыйынга Энергетика министрлигинин жана Президентке караштуу Инвестициялар боюнча улуттук агенттиктин өкүлдөрү да катышты.
Жолугушууда долбоордук кубаттуулугу 2 ГВтка чейин жеткен жогорку натыйжалуу фотоэлектрдик (күн) элементтерин чыгаруучу заманбап өндүрүштү Кыргызстанда түзүү мүмкүнчүлүгү талкууланды.
Тараптар ошондой эле кайра жаралуучу энергетиканы өнүктүрүү, жогорку технологиялык өндүрүштү локалдаштыруу, жаңы жумуш орундарын түзүү жана түз чет өлкөлүк инвестицияларды тартуу маселелери боюнча пикир алышты.
Жолугушуунун жыйынтыгында тараптар жашыл энергетика тармагындагы кызматташтыкты улантууга кызыкдар экенин билдирип, инвестициялык долбоорду ишке ашыруунун шарттарын баалоо жана мүмкүн болгон өндүрүш аянттарын изилдөө боюнча ишти улантууну макулдашты.
