Акчаны адалдоого каршы күрөшүү боюнча окутуучу семинар болду
Мамлекеттик салык кызматы Финансылык чалгындоо кызматы менен биргеликте мамлекеттик эмес уюмдардын өкүлдөрү үчүн ФАТФтын (Акчаны адалдоого каршы күрөшүү боюнча финансылык чараларды иштеп чыгуу тобу) сунуштарын ишке ашырууга арналган семинар уюштурду.
Билдирүүгө караганда, катышуучуларга ФАТФтын 8-сунушунун талаптары түшүндүрүлдү. Анда мамлекеттик эмес уюмдарды террордук ишмердүүлүктү каржылоо максатында пайдалануу коркунучун алдын алуу үчүн тобокелдикке багытталган мамилени колдонуу каралган.
Мындан сырткары Коммерциялык эмес укук боюнча эл аралык борбордун (ICNL) жана Дин таануу изилдөөлөр борборунун адистери баяндама жасап, ФАТФтын эл аралык стандарттары, мамлекеттик эмес уюмдардагы тобокелдиктерди баалоо жана диний уюмдарга карата тобокелдикке багытталган мамиле тууралуу маалымат беришти.
Семинардын катышуучулары террордук ишмердүүлүктү каржылоо тобокелдиктерин аныктоо, мамлекеттик эмес уюмдардын кайсы категориялары көбүрөөк тобокелдикке дуушар болушу мүмкүн экени тууралуу кеңири маалымат алышты.
Мамлекеттик салык кызматы билдиргендей, Финансылык чалгындоо мамлекеттик кызматы менен биргеликте мамлекеттик эмес уюмдарды мыйзамсыз максаттарда пайдалануунун алдын алуу жана террордук ишмердүүлүктү каржылоого каршы аракеттенүүнүн түшүндүрүү иштери мындан ары да улантылат.
