Кыргызстанда макулатураны экспорттоого 6 айга тыюу салынды
Министрлер Кабинети регенерациялануучу кагазды жана картонду (макулатура жана калдыктар) Кыргызстандан ташып чыгууга 6 айлык мөөнөткө убактылуу тыюу салды. Тиешелүү токтомго Министрлер Кабинетинин төрагасы Адылбек Касымалиев кол койду.
Токтомго ылайык, ЕАЭБ ТЭИ ТН 4707 коду менен классификациялануучу регенерациялануучу кагазды жана картонду (макулатура жана калдыктар) өлкөдөн алып чыгууга убактылуу чектөө киргизилди. Тыюу транзиттик жүктөргө жана Кыргыз Республикасынын Министрлер Кабинети тарабынан көрсөтүлүүчү гуманитардык жардамга тиешелүү эмес.
Ошондой эле Экономика жана коммерция министрлигине токтом күчүнө киргенге чейин үч күндөн кечиктирбестен Дүйнөлүк соода уюмуна жана Евразия экономикалык комиссиясына кабыл алынган чечим тууралуу маалымдоо тапшырылды. Тышкы иштер министрлиги болсо ушул эле мөөнөттө КМШнын Аткаруу комитетине тиешелүү билдирүү жөнөтөт.
Мындан тышкары, Мамлекеттик бажы кызматы менен Мамлекеттик чек ара кызматына макулатураны мыйзамсыз өлкөдөн ташып чыгууга бөгөт коюу боюнча чараларды күчөтүү милдети жүктөлдү.
Белгиленгендей, буга чейин кабыл алынган ушул багыттагы 2026-жылдын 14-январындагы токтом күчүн жоготту деп табылды.
Жаңы токтом расмий жарыяланган күндөн тартып 10 күн өткөндөн кийин күчүнө кирет.
