Ноокатта соода-логистикалык борбору курулууда
Ноокат районунун мамлекеттик администрациясынын башчысы Нурлан Керимкулов Ош облусунун Ноокат районунда курулуп жаткан ири соода-логистикалык борбордун курулуш иштеринин жүрүшү менен жеринде таанышты. Бул тууралуу аталган райондун админстрациясынан билдиришти.
Маалыматка таянсак, аталган долбоор мамлекеттик-жеке өнөктөштүк механизминин алкагында Ноокат райондук мамлекеттик администрациясы менен “Мармара-Стоун” ЖЧКсынын ортосунда түзүлгөн келишимдин негизинде ишке ашырылууда.
Долбоордун алкагында соода борбору, соода базарлары, кампалар жана муздаткыч комплекси, автовокзал, мейманкана, коомдук тамактануу жайлары, унаа жуучу жайлар, унаа токтотуучу жайлар жана башка заманбап инфраструктуралык объекттер курулууда.
Учурда курулуш иштеринин 70%и бүткөрүлүп, биринчи этаптагы базарларды 2026-жылдын сентябрь айынын аягында пайдаланууга берүү пландалууда.
Таанышуу учурунда аким курулуштун сапатына жана белгиленген мөөнөттөрдүн так сакталышына өзгөчө көңүл буруп, тиешелүү тапшырмаларды берди. Ошондой эле, жаңы курулуп жаткан базарлардагы соода орундарын биринчи кезекте Ноокат районунун тургундарына ижарага берүү, андан кийин гана башка аймактардан келген соодагерлерди жайгаштыруу зарылдыгын белгиледи.
