Транспорт тармагынан 6 айда бюджетке 614 млн сомдон ашык каражат түштү
Үстүбүздөгү жылдын алгачкы алты айында транспорт тармагындагы кызмат көрсөтүүлөрдөн мамлекеттик бюджетке 614 миллион сомдон ашык каражат түшүп, өткөн жылдын ушул мезгилине салыштырмалуу 17%га көбөйдү. Бул тууралуу Транспорт жана коммуникациялар министрлигинен билдиришти.
Маалыматка ылайык, бюджетке түшкөн каражат былтыркы жылга салыштырмалуу дээрлик 91 миллион сомго көп болгон.
Алты ай ичинде транспорттук ишмердүүлүк боюнча 10 275 лицензия берилген. Алардын басымдуу бөлүгү эл аралык жүк ташууларга туура келип, лицензиялык төлөмдөрдөн бюджетке 9,3 миллион сомдон ашык каражат түшкөн.
Ошондой эле эл аралык автомобиль ташуулары үчүн 117 миңден ашык уруксат кагазы берилип, андан мамлекеттик бюджетке 401,6 миллион сом түшкөн.
Мындан тышкары, өлкө боюнча 421 миңден ашык транспорт каражаты текшерилип, 6 766 мыйзам бузуу аныкталган. Натыйжада 101,6 миллион сомдон ашык айып салынса, анын 70,3 миллион сому мамлекеттик бюджетке өндүрүлгөн. Бул көрсөткүч өткөн жылдын ушул мезгилине салыштырмалуу эки эсеге көп.
Министрликтин маалыматы боюнча, салмак-габариттик көзөмөлдүн алкагында берилген атайын уруксаттардан, жолдорго келтирилген зыяндын ордун толтуруудан жана таразалоо кызматтарынан дагы 127,3 миллион сом мамлекеттик бюджетке которулган.
