Кыргызстан менен JUKI тигүү тармагындагы кызматташууну кеңейтүүнү талкуулады
13-июлда Токио шаарында экономика жана коммерция министринин орун басары Беназир Нурланова жана ата мекендик тигүү ишканаларынын өкүлдөрү JUKI компаниясынын президенти Ацуши Нарикава менен жолугушуу өткөрдү.
Экономика жана коммерция министрлигинин маалыматына ылайык, тараптар Кыргызстандын тигүү өнөр жайын технологиялык жактан жабдуу, өндүрүштү модернизациялоо жана бул багыттагы эки тараптуу кызматташтыкты кеңейтүү мүмкүнчүлүктөрүн талкуулашты.
Кыргыз тарап JUKI компаниясына Кыргызстандагы ишмердүүлүгүн кеңейтүүнү, анын ичинде өнөр жайлык тигүү жабдууларын тейлөө үчүн сервистик жана техникалык борбор түзүү мүмкүнчүлүгүн кароону сунуштады.
Министрдин орун басары Беназир Нурланова сервистик тейлөөнүн өнүгүшү, запастык бөлүктөрдүн өз убагында жеткирилиши жана техникалык колдоонун жеткиликтүү болушу ата мекендик тигүү ишканаларынын үзгүлтүксүз жана натыйжалуу иштөөсү үчүн маанилүү экенин белгиледи.
14-июлда кыргыз делегациясы JUKI компаниясынын Тотиги префектурасындагы өндүрүш ишканасына барып, өндүрүш процесстери, заманбап автоматташтырылган линиялар жана сапатты көзөмөлдөө системалары менен таанышты. Ошондой эле жапон технологияларын ата мекендик тигүү тармагына киргизүү, ишканалардын өндүрүмдүүлүгүн жогорулатуу жана техникалык адистерди даярдоо боюнча мүмкүнчүлүктөр талкууланды.
Жолугушуунун жыйынтыгында тараптар кызматташууну мындан ары да өнүктүрүүгө кызыкдар экенин ырасташты. JUKI компаниясы Кыргызстандын тигүү тармагын технологиялык жактан өнүктүрүүгө багытталган биргелешкен долбоорлорду ишке ашырууга даяр экенин билдирди.
