Кыргызстан СПЕКАда транспорт жана санарип сооданы өнүктүрүүнү сунуштады
Кыргызстан БУУнун Борбордук Азиянын экономикалары үчүн Атайын программасындагы (СПЕКА) төрагалыгынын алкагында транспорт, логистика, сооданы санариптештирүү жана чек аралык кызматташтыкты өнүктүрүүгө багытталган артыкчылыктарын сунуштады.
Нью-Йорк шаарындагы БУУнун штаб-квартирасында экономика жана коммерция министри Бакыт Сыдыковдун төрагалыгы алдында СПЕКАга катышуучу мамлекеттердин туруктуу өкүлдөрүнүн жумушчу кеңешмеси өттү. Кыргызстан 2026-жылы бул программага төрагалык кылууда.
Жыйында министр деңизге түз чыга албаган өлкөлөр үчүн транспортту, логистиканы жана чек ара аркылуу жүк ташууларды өнүктүрүү туруктуу экономикалык өсүштүн негизги шарттарынын бири экенин белгиледи.
Бакыт Сыдыков Кыргызстандын төрагалыгынын негизги багыттарын тааныштырды. Аларга:
- туруктуу транспорт жана логистиканы өнүктүрүү;
- сооданы санариптештирүү жана электрондук коммерцияны жайылтуу;
- чакан жана орто бизнести колдоо;
- чек аралык биргелешкен долбоорлорду ишке ашыруу кирет.
Ошондой эле министр Транскаспий эл аралык транспорттук коридорунда маалымат жана документ жүгүртүүнү санариптештирүү боюнча СПЕКАнын Жол картасын ишке ашырууга өзгөчө көңүл буруларын билдирди.
Анын айтымында, Кыргызстан СПЕКАга мүчө мамлекеттердин 2027-жылга чейин жүк ташуулар боюнча электрондук маалыматтарды БУУнун эл аралык стандарттарына ылайык колдонууга өтүүсүн колдойт.
Министр Кыргызстан аймактык кызматташтыкты кеңейтүүгө, Ортоңку коридорду өнүктүрүүгө, кагазсыз чек аралык сооданы жайылтууга жана СПЕКАнын көп тараптуу механизмдерин өркүндөтүүгө багытталган иштерди улантарын белгиледи.
