Кыргызстан АКШнын "Trade Over Aid" демилгесин колдой турганын билдирди
Экономика жана коммерция министри Бакыт Сыдыков Нью-Йоркто өткөн Туруктуу өнүгүү боюнча Жогорку деңгээлдеги саясий форумда сүйлөп, Кыргызстан АКШнын "Trade Over Aid" ("Жардамдын ордуна соода") демилгесин колдой турганын билдирди.
Ведомствонун маалыматына ылайык, министр Бакыт Сыдыков демилгенин негизги принциптери Кыргыз Республикасынын 2030-жылга чейинки Улуттук өнүгүү программасына шайкеш келерин белгиледи. Анын айтымында, өлкөдө жеке секторду өнүктүрүү, индустриялаштыруу, экспортту диверсификациялоо жана инвестицияларды тартуу артыкчылыктуу багыттар катары аныкталган.
Министр АКШ менен кызматташуунун келечектүү багыттары катары гидроэнергетиканы, стратегиялык мааниге ээ пайдалуу кендерди өздөштүрүүнү, маалыматтык технологияларды, айыл чарбасын, туризмди жана транспорттук инфраструктураны атады.
Ошондой эле ал Кытай – Кыргызстан – Өзбекстан темир жолу аймактагы соода-экономикалык байланыштарды кеңейтүүгө өбөлгө түзө турган маанилүү транспорттук долбоорлордун бири экенин белгиледи.
Бакыт Сыдыков деңизге түз чыгуусу жок мамлекеттер үчүн заманбап инфраструктура, каржылоого жеткиликтүүлүк жана соода жол-жоболорун жөнөкөйлөтүү өзгөчө мааниге ээ экенин айтты. Мындан тышкары, эл аралык техникалык жардам сооданы кеңейтүүгө, инвестицияларды тартууга жана өлкөлөрдүн экономикалык потенциалын жогорулатууга багытталышы керектигин баса белгиледи.
Министр сөзүнүн соңунда Кыргызстандын негизги максаты сооданы өнүктүрүү, инвестицияларды тартуу жана ишкердикти колдоо аркылуу атаандаштыкка жөндөмдүү экономиканы калыптандыруу жана калктын бакубаттуулугун жогорулатуу экенин белгиледи.
