Кыргызстан менен Өзбекстан биргелешкен инвестициялык долбоорлорду илгерилетет
Кыргызстандын Өзбекстандагы Соода өкүлчүлүгү Ангрен шаарындагы "Ташкент" эркин экономикалык аймагына иш сапары менен барып, өнөр жай кооперациясын жана инвестициялык кызматташтыкты кеңейтүү маселелерин талкуулады.
Экономика жана коммерция министрлигинин маалыматына ылайык, иш сапардын алкагында Кыргызстандын Соода өкүлчүлүгүнүн өкүлдөрү "Ташкент" эркин экономикалык аймагынын дирекциясынын директору Галибжан Эшмирзаев менен жолугушуу өткөрдү.
Жолугушууда эки өлкөнүн соода-экономикалык жана инвестициялык кызматташтыгын өнүктүрүү, өнөр жай кооперациясын кеңейтүү, ошондой эле кыргыз жана өзбек ишкерлеринин ортосундагы кызматташтыкты чыңдоо маселелери каралды.
Мындан тышкары, кыргыз делегациясы эркин экономикалык аймактын ишмердүүлүгү менен таанышып, чет өлкөлүк инвесторлор үчүн түзүлгөн шарттар, мамлекеттик колдоо механизмдери, ошондой эле салыктык жана бажылык жеңилдиктер тууралуу маалымат алды.
Жолугушуунун жыйынтыгында тараптар эркин экономикалык аймактарды башкаруу жаатында тажрыйба алмашууга, биргелешкен инвестициялык долбоорлорду илгерилетүүгө жана тиешелүү мекемелердин ортосунда туруктуу кызматташууну өнүктүрүүгө макулдашты.
Министрликтин маалыматына караганда, бул макулдашуулар Кыргызстан менен Өзбекстандын соода-экономикалык өнөктөштүгүн мындан ары да бекемдөөгө өбөлгө түзөт.
