Кыргызстан менен Өзбекстан товар жүгүртүүнү көбөйтүүнү талкуулады
Экономика жана коммерция министрлигинде Кыргызстандын экономика жана коммерция министринин орун басары Султан Ахматов менен Өзбекстандын инвестициялар, өнөр жай жана соода министринин орун басары Хуррам Тешабаев жолугушуп, эки өлкөнүн соода-экономикалык жана инвестициялык кызматташтыгын өнүктүрүү маселелерин талкуулашты.
Ведомствонун маалыматына ылайык, жолугушууда эки мамлекеттин башчылары жетишкен макулдашууларды ишке ашыруунун жүрүшү жана аларды алдыга жылдыруу боюнча практикалык чаралар каралды.
Тараптар өз ара товар жүгүртүүнү көбөйтүү, өнөр жай кооперациясын кеңейтүү жана биргелешкен инвестициялык долбоорлорду ишке ашырууга өзгөчө көңүл бурушту.
Мындан тышкары, Өзбекстан–Кыргызстан өнүктүрүү фондунун алкагында ишке ашырылып жаткан долбоорлордун жүрүшү өзүнчө талкууланып, анын эки тараптуу экономикалык өнөктөштүктү чыңдоодогу мааниси белгиленди.
Жолугушуунун жыйынтыгында Кыргызстан менен Өзбекстан соода-экономикалык байланыштарды мындан ары да кеңейтүүгө, жетишилген макулдашууларды өз убагында ишке ашырууга жана биргелешкен кызматташууну системалуу түрдө улантууга кызыкдар экенин ырасташты.
