Кыргызстан менен Түштүк Корея инвестициялык байланыштарды бекемдейт
Инвестициялар боюнча улуттук агенттиктин директору Равшанбек Сабиров Кореянын Кыргызстандагы элчиси Ким Квангже менен жолугушуп, эки өлкөнүн инвестициялык кызматташтыгын кеңейтүү маселелерин талкуулады.
Жолугушууда Түштүк Кореянын инвестицияларын Кыргызстанга тартуу, биргелешкен инвестициялык долбоорлорду ишке ашыруу жана инвесторлор үчүн жагымдуу шарттарды түзүү маселелерине өзгөчө көңүл бурулду.
Тараптар инвесторлордун укуктарын коргоо боюнча укуктук механизмдерди, мамлекеттик кепилдиктерди жана инвестициялык ишмердүүлүктү колдоо чараларын да талкуулашты.
Равшанбек Сабиров Кыргызстанда колдонулуп жаткан инвесторлорду коштоо механизмдери, анын ичинде "бирдиктүү терезе" тууралуу маалымат берип, инвестициялык климатты жакшыртуу боюнча жүргүзүлүп жаткан иштерге токтолду.
Ал Кыргызстан заманбап технологияларды тартууга, жаңы өндүрүштөрдү ачууга жана Түштүк Корея менен узак мөөнөттүү инвестициялык өнөктөштүктү өнүктүрүүгө кызыкдар экенин белгиледи.
Өз кезегинде элчи Ким Квангже корей тарап Кыргызстан менен инвестициялык кызматташууну мындан ары да кеңейтүүгө, ошондой эле эки өлкөнүн бизнес чөйрөлөрүнүн байланышын чыңдоого кызыкдар экенин билдирди.
