Кыргызстанда калкка көрсөтүлүүчү кызматтар 8,3%га кымбаттады
Быйыл өлкө боюнча керектөө баалары жалпысынан 5,5%га өстү. Бул тууралуу Улуттук статистика комитети билдирди.
Маалыматка ылайык, жылдын биринчи жарымында эң көп калкка көрсөтүлүүчү кызматтардын наркы өсүп, 8,3%га жогорулады.
Ошондой эле алкоголдук ичимдиктер жана тамеки буюмдары 7,2%га, тамак-аш азыктары жана алкоголсуз суусундуктар 5,4%га, ал эми азык-түлүк эмес товарлар 3,3%га кымбаттады.
Өлкөнүн бардык аймактарында баалар өскөн. Алсак, эң жогорку өсүш Ош облусунда катталып, 12,5%ды түзгөн. Кызмат көрсөтүүлөр 21,8%га, алкоголдук ичимдиктер жана тамеки буюмдары 17,3%га, азык-түлүк эмес товарлар 9,8%га кымбаттаган.
Ал эми тамак-аш азыктары жана алкоголсуз суусундуктардын баасы эң көп Ысык-Көлдө өсүп, 8,9%га жогорулаган.
Тактап кетсек, бул көрсөткүчтөр өткөн жылдын декабрына салыштырмалуу чыгарылган.
