Негизги капиталга салынган инвестициялар 204,4 млрд сомго жетти
Кыргызстанда 2026-жылдын биринчи жарым жылдыгында негизги капиталга инвестициялардын көлөмү 204 миллиард 400 миллион сомду түздү. Бул тууралуу Улуттук статистика комитетинин төрагасы Бактыбек Кудайбергенов билдирди.
Маалыматка ылайык, өткөн жылдын ушул мезгилине салыштырмалуу инвестициялардын көлөмү ички жана тышкы каржылоо булактарынын көбөйүшүнүн эсебинен өстү.
Тактап айтканда, ички инвестициялар 1,5 эсеге көбөйүп, 166,7 миллиард сомду түздү. Ал эми тышкы инвестициялардын көлөмү 3,2 эсеге өсүп, 37,6 миллиард сомго жетти.
Инвестициялар негизинен турак жай курулушуна, транспорт жана жүктөрдү сактоо тармагына, пайдалуу кендерди казууга, электр энергиясы жана газ менен камсыздоого, кайра иштетүү өнөр жайына жана башка экономикалык тармактарга багытталган.
Белгиленгендей, инвестициялардын эң ири көлөмү Бишкек шаарында, ошондой эле Жалал-Абад, Ысык-Көл жана Чүй облустарында өздөштүрүлгөн.
