Кыргыз-кытай өкмөттөр аралык комиссиясынын 17-жыйыны Бишкекте өттү
Бишкекте Министрлер Кабинетинин Төрагасынын орун басары Эрлист Акунбеков менен Кытай Эл Республикасынын Коммерция министринин орун басары Лин Цзи тең төрагалык кылган Соода-экономикалык кызматташтык боюнча кыргыз-кытай өкмөттөр аралык комиссиясынын 17-жыйыны өттү. Бул тууралуу Өкмөттөн билдиришти.
Эрлист Акунбеков жыйын Бишкекте өтө турган Шанхай кызматташтык уюмунун саммитинин жана Кытай жетекчилигинин Кыргызстанга мамлекеттик сапарынын алдында уюштурулуп жатканын белгиледи. Анын айтымында, бул жолугушуу эки тараптын позицияларын шайкеш келтирүүгө, биргелешкен аракеттерди координациялоого жана күн тартибиндеги актуалдуу маселелерди ыкчам чечүүгө өбөлгө түзөт.
Ошондой эле ал мамлекет башчыларынын колдоосу менен "Кыргызстан – Кытай – Өзбекстан" темир жолунун курулушу башталганын, үчүнчү "Бедел" көзөмөл-өткөрүү пункту ачылганын жана "Барскоон – Бедел – Үчтурпан – Аксуу" автожолунун курулушу жүрүп жатканын белгилеп, бул долбоорлор эки өлкөнүн экономикалык кызматташтыгын жаңы деңгээлге чыгарарын билдирди.
Өз кезегинде Кытайдын Коммерция министринин орун басары Лин Цзи кытай тарап Кыргызстан менен өз ара пайдалуу кызматташтыкты бардык багыттар боюнча мындан ары да тереңдетүүгө кызыкдар экенин айтты.
Жыйындын жүрүшүндө соода-экономикалык мамилелерди өнүктүрүү, транспорттук-логистикалык байланыштарды чыңдоо, энергетика, өнөр жай, айыл чарба жана каржы тармагындагы кызматташтыкты кеңейтүү маселелери талкууланды. Отурумдун жыйынтыгында тараптар тиешелүү протоколго кол коюшту.
