Кыргыз текстиль продукциясын дүйнөлүк рынокко чыгаруу пландалууда
Президенти Садыр Жапаровдун текстиль жана тигүү тармагын мамлекеттик деңгээлде колдоо саясатынын алкагында, жеңил өнөр жайын заманбап өндүрүшкө айландыруу боюнча ырааттуу иштер жүргүзүлүүдө. Бул тууралуу президенттин өзгөчө тапшырмалар боюнча атайын өкүлү Бакыт Төрөбаев билдирди.
Маалыматка ылайык, 17-июлда Сокулук районунун Дача-Суу айылында жайгашкан “Кыргыз Текстиль Хабында”өндүрүштүк инфраструктураны чыңдоо, материалдык-техникалык базаны өркүндөтүү, ошондой эле кыргыз текстиль продукциясын Европа жана дүйнөлүк рынокко чыгаруунун мүмкүнчүлүктөрүн талкууланды.
“Кыргыз Текстиль Хабын” өнүктүрүүгө багытталган ири долбоорлордун негизги максаты – өлкөнүн текстиль тармагынын атаандаштыкка жөндөмдүүлүгүн жогорулатуу, инвестицияларды тартуу, ата мекендик өндүрүштү кеңейтүү, импортту алмаштыруучу жана экспортко багытталган сапаттуу продукцияны көбөйтүү.
Бул хаб – жаңы өндүрүштөрдү ишке киргизген, заманбап технологияларды өздөштүргөн, инвестицияларды тарткан жана миңдеген жарандарды туруктуу жумуш менен камсыз кылууга багытталган стратегиялык долбоор.
Анын ийгиликтүү ишке ашуусу жергиликтүү ишкерлер үчүн жаңы мүмкүнчүлүктөрдү ачып, экспорттун көлөмүн көбөйтүүгө, өлкөнүн текстиль жеңил өнөр жайынын потенциалын бекемдөөгө жана Кыргызстандын экономикалык өсүшүнө олуттуу салым кошот.
