Кыргызстанда брокердик эсепти 15 мүнөттө аралыктан ачууга мүмкүн болду
Кыргызстанда "Өкмөттүк акселераторлор" программасынын алкагында дагы эки реформа ийгиликтүү аяктады. Натыйжада брокердик эсепти аралыктан ачуу 15 мүнөткө чейин кыскарып, санитардык китепчени тариздөө процесси да кыйла жөнөкөйлөштүрүлдү.
Министрлер Кабинетинин төрагасы Адылбек Касымалиев аппараттык кеңешмеде "Өкмөттүк акселераторлор" программасынын алкагында ишке ашырылган эки реформанын жыйынтыгын чыгарды.
Анын айтымында, быйыл ар кандай социалдык-экономикалык маселелерди чечүүгө багытталган тогуз реформа башталган. Алардын экөө боюнча коюлган максаттар толугу менен аткарылды.
Реформалардын бири Кыргызстандын баалуу кагаздар рыногунда финансылык кызматтарга жетүүнү жеңилдетүүгө багытталган. Анын негизинде брокердик эсепти аралыктан ачууда кардарды идентификациялоо жана верификациялоо убактысы болжол менен 2 күндөн 15 мүнөткө чейин кыскартылды. Бул санариптик идентификацияны киргизүү, мамлекеттик маалымат системалары менен интеграция жана маалыматтарды автоматтык текшерүү аркылуу ишке ашты.
Экинчи реформа санитардык китепчени тариздөө процессин санариптештирүүгө багытталды. Натыйжада документти алуу мөөнөтү 8 күндөн 4 жумушчу күнгө чейин кыскарып, медициналык мекемелерге баруулардын саны 5тен 2ге чейин азайды.
Мындан тышкары, электрондук медициналык китепчелердин мамлекеттик реестри түзүлүп, документтерди жасалмалоо тобокелдиги төмөндөдү. Ошондой эле иш берүүчүлөр жана көзөмөлдөөчү органдар санитардык китепченин актуалдуу статусун онлайн режиминде текшере алышат.
Адылбек Касымалиев бул реформалар мамлекеттик кызматтарды жөнөкөйлөтүп, жарандар үчүн ыңгайлуулукту арттырганын белгилеп, аларды ишке ашырууга катышкан мамлекеттик органдарга ыраазычылык билдирди.
