А. Касымалиев: Кыргызстандын экономикасы жарым жылда 11,9% өстү
2026-жылдын биринчи жарым жылдыгынын жыйынтыгы боюнча Кыргызстандын ички дүң продукциясынын көлөмү 960 млрд сомго жетип, экономика 11,9% өстү. Бул тууралуу Министрлер Кабинетинин Төрагасы Адылбек Касымалиев аппараттык жыйында билдирди.
Анын айтымында, 2026-жылдын январь–июнь айларында Кыргызстандын ички дүң продукциясынын (ИДП) көлөмү 960 млрд сомду түзүп, реалдуу өсүү темпи 11,9% болду.
Адылбек Касымалиев белгилегендей, Кыргызстан ЕАЭБге мүчө мамлекеттердин арасында ИДПнын өсүү темпи боюнча биринчи орунду ээледи.
Экономикалык өсүшкө бардык негизги тармактар салым кошкон. Тактап айтканда, курулуш тармагы 69,6%, өнөр жай 12,8%, тейлөө тармагы 6%, ал эми айыл чарба 4,3% өскөн.
Өнөр жайда химиялык продукцияны өндүрүү 2,9 эсеге, фармацевтикалык продукцияны өндүрүү 1,8 эсеге, транспорт каражаттарын өндүрүү 40,7%, курулуш материалдарын өндүрүү 33,4%, негизги металлдарды өндүрүү 11,9%, тамак-аш өндүрүшү 8,2%, ал эми кен байлыктарды казып алуу 12,8% көбөйгөн.
Ошондой эле негизги капиталга инвестициялардын көлөмү 204,4 млрд сомду түзүп, өткөн жылдын ушул мезгилине салыштырмалуу 64,3% өскөн. Бул өсүш ички каржылоо булактарынын 1,5 эсеге, тышкы каржылоо булактарынын 3,2 эсеге көбөйүшү менен камсыз болгон.
