"Кытай–Кыргызстан–Өзбекстан" темир жолу: Бажы жол-жоболору жөнөкөйлөтүлөт
Күн мурун Мамлекеттик бажы кызматында мекеменин төрагасынын биринчи орун басары Улан Кимсанов менен "Кытай–Кыргызстан–Өзбекстан темир жол компаниясы" ЖЧКсынын башкы директору Гун Хунъюндун жумушчу жолугушуусу өттү.
Жолугушууда Кытай–Кыргызстан–Өзбекстан темир жолунун курулушуна арналган товарларды өткөрүүдө бажылык башкарууну өркүндөтүү жана бажы жол-жоболорун оптималдаштыруу маселелери каралды.
Тараптар инфраструктуралык долбоордо колдонулуучу товарларды бажылык тариздөөдө жаралган маселелерге өзгөчө көңүл бурушту. Мамлекеттик бажы кызматы колдонуудагы бажы жол-жоболору боюнча түшүндүрмө берип, товарларды тариздөө процессин жөнөкөйлөтүү боюнча сунуштарын билдирди. Ошондой эле ыкчам өз ара аракеттенүүнү камсыз кылуу үчүн аймактык бажы органдарындагы жооптуу кызматкерлер аныкталды.
Мындан тышкары, Мамлекеттик бажы кызматы компаниянын кызматкерлерине лицензиясы бар транспорттук компаниялар аркылуу "Торугарт" жана "Иркештам" өткөрүү пункттары менен борборлоштурулган ташууларды уюштурууну сунуштады. Бул чара лицензиясы жок ташуучуларды пайдаланууга жол бербөө, тобокелдиктерди азайтуу жана ЕАЭБдин бажы чек арасынан өтүүдө коопсуздукту камсыз кылууга багытталган.
Жолугушуунун соңунда тараптар стратегиялык темир жол долбоорунун алкагында товарлардын үзгүлтүксүз өткөрүлүшүн камсыз кылуу жана кызматташууну мындан ары да улантуу боюнча даяр экенин билдиришти.
