"Мамлекеттик финансылык холдинг" бир жылда 45 млрд сомдон ашык насыя берди
Бүгүн "Мамлекеттик финансылык холдинг" ААКсынын Финансылык-кредиттик фонддон кайра түзүлгөнүнө бир жыл болду. Ал эми уюмдун жалпы тарыхы Кыргыз Республикасынын Финансы министрлигине караштуу Финансылык-кредиттик фонд түзүлгөн учурдан тартып 29 жылды камтыйт.
2025-жылдын 17-июлунда Министрлер Кабинетинин токтому менен "Мамлекеттик финансылык холдинг" ААКсы түзүлүп, анын укуктук макамы жана негизги ишмердүүлүк багыттары аныкталган.
Бир жыл ичинде холдингдин уставдык капиталы эки эседен ашык көбөйүп, 12,556 млрд сомго жетти. Ошондой эле стратегиялык долбоорлорду ишке ашырууга 45 млрд сомдон ашык бюджеттик кредит берилди.
Мындан тышкары, Аймактарды өнүктүрүү фонддору аркылуу жалпы суммасы 1,2 млрд сомдон ашкан 247 долбоор каржыланды. Ал эми кепилдик берүү механизминин негизинде жалпы көлөмү 119 млрд сомдон ашканинвестициялык долбоорлорду каржылоого шарт түзүлдү.
Холдингдин колдоосу менен транспорт жана энергетика, өнөр жай, айыл чарба, авиация, саламаттык сактоо тармактарында, ошондой эле аймактарды өнүктүрүү жана чакан жана орто бизнести колдоого багытталган бир катар долбоорлор ишке ашырылып жатат.
Ошондой эле мамлекеттик үлүшү бар акционердик коомдорду башкаруунун натыйжалуулугун жогорулатуу боюнча иштердин алкагында 2025-жылдын жыйынтыгы менен мамлекеттик бюджетке болжол менен 1,4 млрд сом дивиденд которулуп, мамлекеттик катышуусу бар компаниялардын капиталдашуусу өскөнү белгиленди.
Маалыматка ылайык, "Мамлекеттик финансылык холдинг" алдыдагы мезгилде да мамлекеттик колдоо механизмдерин кеңейтүүнү, жаңы инвестицияларды тартууну жана өлкөнүн туруктуу экономикалык өнүгүүсүнө багытталган долбоорлорду ишке ашырууну улантат.
