Жарым жылда мамлекеттик бюджетке 454 млрд сомдон ашык киреше түштү
2026-жылдын январь–июнь айларында мамлекеттик бюджеттин кирешеси 454,3 млрд сомду түзүп, план 105,3% аткарылды. Бул тууралуу Министрлер Кабинетинин төрагасы Адылбек Касымалиев аппараттык жыйында билдирди.
Анын айтымында, алты айдын жыйынтыгы менен мамлекеттик бюджеттин кирешеси 454 млрд 251,8 млн сомду түзүп, пландалган көрсөткүчтөн 22 млрд 652,7 млн сомго көп болду. Натыйжада бюджеттин киреше планы 105,3% аткарылган.
Ошондой эле Мамлекеттик салык кызматы 191 млрд 620 млн сом чогултуп, планды 104%га аткарды. Бул белгиленген көрсөткүчтөн 7 млрд 442,7 млн сомго көп.
Ал эми Мамлекеттик бажы кызматынын кирешеси 87 млрд 380,4 млн сомду түзүп, план 105,3%га аткарылган. Бажы төлөмдөрү пландан 4 млрд 385,8 млн сомго ашык түшкөн.
Адылбек Касымалиев мамлекеттик органдарга бюджеттик кирешелерди көбөйтүү боюнча жетишилген жогорку темпти сактап калуу жана иштерди ушул эле деңгээлде улантуу зарылдыгын белгиледи.
