Чүйдө 5,5 млн долларлык айнек заводу ишке кирүүгө даярдалууда
Бүгүн Инвестициялар боюнча улуттук агенттиктин директору Равшанбек Сабиров Чүй облусунун Новопокровка айылында курулуп жаткан "Гласс Центр" ЖЧК КӨ БИнин өндүрүш комплексине барды.
Улуттук агенттиктин маалыматына ылайык, иш сапар инвестициялык долбоорлордун ишке ашырылышын көзөмөлдөө алкагында уюштурулган.
Сапардын жүрүшүндө Равшанбек Сабиров айнек пакеттерин жана жарыкты чагылдыруучу айнектерди чыгаруучу заманбап заводдун курулушунун жүрүшү менен таанышып, инвесторлор жана ишкананын жетекчилиги менен объектти пайдаланууга берүү боюнча даярдык иштерин талкуулады.
Анын айтымында, мындай инвестициялык долбоорлор өлкөнүн инвестициялык жагымдуулугун арттырып, жаңы өндүрүштөрдүн ачылышына жана жумуш орундарын түзүүгө өбөлгө түзөт.
Долбоор кыргыз-өзбек инвестициялык кызматташтыгынын алкагында ишке ашырылып жатат. Жалпы инвестициянын көлөмү 5,5 млн АКШ долларын түзөт. Каражаттын 50,7%ы Өзбекстан–Кыргызстан өнүктүрүү фонду тарабынан каржыланса, 49,3%ы инвесторлордун өздүк каражаттарынын эсебинен камсыздалган.
Завод ишке берилгенден кийин өлкөдө курулуш айнектерин өндүрүүнүн көлөмү көбөйүп, импортко болгон көз карандылык азаят. Ошондой эле жаңы жумуш орундарын түзүүгө жана Кыргызстандын инвестициялык жагымдуулугун жогорулатууга салым кошору белгиленди.
