Кыргызстан менен ЕЭК техникалык жөнгө салуу боюнча кызматташууну күчөтөт
23-июлда Экономика жана коммерция министрлигинде министрдин орун басары Султан Ахматов Евразия экономикалык комиссиясынын Коллегиясынын мүчөсү, техникалык жөнгө салуу боюнча министри Александр Субботин менен жолугушту.
Министрликтин маалыматына ылайык, жолугушууда техникалык жөнгө салуу чөйрөсүндөгү актуалдуу маселелер жана Евразия экономикалык бирлигине (ЕАЭБ) мүчө мамлекеттердин өз ара аракеттенүү механизмдерин өркүндөтүү жолдору талкууланды.
Тараптар ЕАЭБ өлкөлөрүндө техникалык жөнгө салуу системасын өнүктүрүүгө, шайкештикти баалоо механизмдерин жакшыртууга, өз ара соодадагы тоскоолдуктарды жоюуга, милдеттүү талаптарды шайкеш келтирүүгө жана Евразия экономикалык комиссиясы менен кызматташууну чыңдоого өзгөчө көңүл бурушту.
Жолугушуунун соңунда тараптар техникалык жөнгө салуу системасын өркүндөтүүгө жана ЕАЭБ алкагындагы интеграциялык процесстерди өнүктүрүүгө багытталган биргелешкен демилгелерди мындан ары да ишке ашыруу боюнча кызматташууну улантууга даяр экенин ырасташты.
