Санкциялык тобокелдиктер: 3 компаниянын иши токтотулуп, 40ка жакыны текшерилүүдө
Кыргызстанда эл аралык санкциялык тартиптерди сактоо боюнча мамлекеттик саясатты ишке ашыруу маселелери талкууланды. Бул тууралуу Экономика министрлигинин басма сөз кызматы билдирди.
Маалыматка ылайык, 27-июлда өткөн кеңешмеге мамлекеттик органдардын, Улуттук банктын жана коммерциялык банктардын өкүлдөрү катышты. Жыйында Кыргызстандын эл аралык өнөктөштөрү менен санкциялык талаптарды сактоо багытындагы кызматташтыгы жана көрүлүп жаткан чаралар каралды.
Президенттин өзгөчө тапшырмалар боюнча өкүлү Бакыт Сыдыков Улуу Британиянын Тышкы иштер министрлигинин жана АКШнын Каржы министрлигинин өкүлдөрү менен өткөн жолугушуулардын жыйынтыктары тууралуу маалымат берди.
Анда Кыргызстандын санкциялык режимдерди кыйгап өтүүгө жол бербөө боюнча жүргүзүп жаткан иштери өнөктөштөр тарабынан оң бааланып жатканы белгиленди.
Ошондой эле санкциялык тобокелдиги жогору болушу мүмкүн болгон компанияларга карата текшерүүлөр жүргүзүлүп жатканы айтылды.
Кеңешмеде "ЭкоИсламик Банктын" өкүлдөрү банк санкциялык тизмелерге киргизилген жеке жактарга жана компанияларга кызмат көрсөтүү боюнча операцияларды жүргүзбөй турганын маалымдашты.
Жыйында акыркы үч жуманын ичинде санкциялык тобокелдиктерди азайтуу багытында бир катар чаралар көрүлгөнү айтылды. Анын ичинде "Шисан", "Рама Групп" жана "Нова Проект" ЖЧКларынын ишмердүүлүгү токтотулуп, бир криптокомпаниянын лицензиясы кайтарылып алынган.
Ошондой эле июндун соңунан бери санкциялык тобокелдиги жогору болгон 40ка жакын компания аныкталып, алар боюнча текшерүү иштери жүргүзүлүп жатканы маалымдалды.
Кеңешменин жыйынтыгында тиешелүү мамлекеттик органдарга бул субъекттер боюнча текшерүүлөрдү бир жуманын ичинде аяктоо тапшырылды.
Министрлик эл аралык өнөктөштөр менен кызматташууну улантып, экспорттук көзөмөлдү күчөтүү боюнча иштерди улантарын билдирди.
