Айбек Жунушалиев Чаншанын тажрыйбасын Бишкекте колдонууну талкуулады
Бишкек шаарынын мэри Айбек Жунушалиев Чанша шаарына болгон иш сапарынын алкагында тиричилик калдыктарын кайра иштетип, электр энергиясын өндүргөн Hunan Junxin Environmental Protection Co., Ltd. компаниясынын комплексине барды. Бул тууралуу мэриянын басма сөз кызматы кабарлады.
Делегацияны компаниянын директорлор кеңешинин төрагасы Дай Даого кабыл алды. Ишкананын өкүлдөрү таштандыларды кайра иштетүүнүн технологиялык цикли, экологиялык көзөмөл системасы жана электр энергиясын өндүрүү процесси тууралуу кеңири маалымат беришти.
Маалымдалгандай, комплекстин кубаттуулугу суткасына 10 миң тоннадан ашык калдыкты кайра иштетүүгө жетет.
Иш сапардын жүрүшүндө зыяндуу заттардын абага чыгарылышын тазалоонун заманбап технологияларына, өндүрүштү автоматташтырылган көзөмөлдөөгө жана калдыктарды коопсуз утилдештирүүгө өзгөчө көңүл бурулду.
Сапар Бишкектеги таштандыларды кайра иштетүү комплексинин экинчи этабын ишке ашырууга даярдык көрүү алкагында практикалык мааниге ээ. Аталган долбоор да Junxin компаниясы тарабынан ишке ашырылууда. Заводдун биринчи этабы суткасына 1000 тонна калдыкты кайра иштетүүгө эсептелген. Экинчи этап аяктагандан кийин жалпы кубаттуулук суткасына 3000 тоннага жетет.
Жыйынтыгында тараптар Чанша шаарынын тажрыйбасын Бишкекте калдыктарды кайра иштетүү жана экологиялык таза электр энергиясын өндүрүү системасын өнүктүрүүдө колдонуу мүмкүнчүлүктөрүн талкуулашты.
