Саламаттык сактоо министрлигинде каржылык мыйзам бузуу аныкталды
Эсептөө палатасы 2025-жылга карата Саламаттык сактоо министрлигинин жана анын мекемелеринин бюджетинин аткарылышына жүргүзүлгөн аудиттин жыйынтыгын чыгарды.
Эсептөө палатасынын маалыматына ылайык, бюджеттик каражаттарды пайдалануу негизинен мыйзам талаптарына ылайык жүргүзүлгөн.
Бирок аудиттин жүрүшүндө эмгек акыны мыйзамсыз төлөө, курулуш иштеринин көлөмүн негизсиз көбөйтүү, бюджеттик каражаттарды пайдалануудагы ченемдерди бузуу жана негизсиз киреше алуу фактылары аныкталган.
Мындан тышкары, бухгалтердик эсептин так жүргүзүлбөгөндүгүнөн негизги каражаттар менен дебитордук карыздардын толук эсепке алынбаганы, бирдиктүү казыналык эсептен сырткары жүргүзүлгөн чыгымдар жана бюджеттик жоготуулар белгиленген.
Аудиттин жыйынтыгында Эсептөө палатасы Саламаттык сактоо министрлигине аныкталган кемчиликтерди жоюу, каражаттарды калыбына келтирүү жана финансылык тартипти күчөтүү боюнча тапшырмаларды берди.
Ошондой эле министрликтин карамагындагы мекемелерде аныкталган олуттуу каржылык мыйзам бузуулар боюнча үч материал укук коргоо органдарына жөнөтүлдү.
