Кыргызстан менен Орусиянын экономикалык форуму өтүүдө
Ысык-Көлдө 5-августта Кыргызстан-Орусия экономикалык форуму башталды. Иш-чара 5-7-август күндөрү өтүп, ага мамлекеттик жана эл аралык уюмдардын өкүлдөрү, илимий чөйрөнүн эксперттери, бизнес коомчулуктун өкүлдөрү, ошондой эле эки өлкөнүн мамлекеттик органдарынын жетекчилери катышууда.
Маалыматка ылайык, форумдун алкагында дүйнөлүк экономиканын учурдагы тенденциялары, тышкы экономикалык факторлордун таасири, Кыргызстан менен Орусиянын ортосундагы соода-экономикалык байланыштарды чыңдоо, инвестициялык кызматташтыкты кеңейтүү жана биргелешкен долбоорлорду ишке ашыруу маселелери талкууланат.
Иш-чаранын уюштуруучулары болуп Орусия-Кыргыз өнүктүрүү фонду, Орусиянын Экономикалык өнүгүү министрлиги, Кыргызстандын Экономика жана коммерция министрлиги, ошондой эле “Росконгресс” фонду саналат.
Форум эки өлкөнүн экономикалык кызматташтыгын мындан ары өнүктүрүүгө, жаңы өнөктөштүк байланыштарды түзүүгө жана өз ара пайдалуу инвестициялык долбоорлорду илгерилетүүгө багытталган маанилүү аянтча болуп саналат.
